28.5.05
Kjamms

Ég át aleiguna mína í dag. Ég fór tvisvar á kaffihús og þá var aleigan farin. Leið mín lá fyrst í Smekkleysu þar sem ég hlýddi á nokkur lög með Huun Huur Tu og söngkonunni Ninu Nastasiu. Svo eftir ráp og rölt viltist ég inn á Prikið og át vonda samloku og djúpsoðnar franskar. En það er svo sem ásættanlegt að borða vonda samloku í góðum félagsskap. Um kvöldið lenti ég í grillveislu og á tónleikum, Lady and bird. Tónleikarnir voru yndislegir en liðu fljótt út í buskann. Þá lenti ég á Kaffibrennslunni. Eftir mikið vesen og vandræði fékk ég köku sem var vond. En það er allt í lagi að borða vonda köku í góðum félagsskap. Fólk var vel í glasi á þeim stað, afvelta miðaldra kvenmaður á sokkaleistunum stíflaði útgönguleiðina. En það var kominn nýr matseðill.
ritað af ~elísabetu~ klukkan 23:18. |

---

24.5.05
Fitness

Í gær héldum við Maggi kökuboð. Við bökuðum kryddbrauð og tveggja hæða súkkulaðitertu. Þetta borðuðum við með bestu lyst ásamt gesti kökuboðsins. Kryddbrauðið var reyndar svolítið blautt og kakan ekki alveg eins og stóð í uppskriftinni, við bættum nefnilega við ýmsum hlutum sem okkur fannst sniðugir í köku. Kakan kallaðist fitness-kakan vegna fitness-flaga sem fundust í henni. Fitness-flögurnar urðu fullseigar og kom skrýtinn svipur á menn þegar þeir fundu þær í sneiðinni sinni. Ég á myndir af þessum ósköpum en ég kann ekki að setja þær inn. Við gerðum of mikið krem svo okkur fannst tilvalið að nota afganginn af því til að leira úr og gróðursetja í plöntur. Kakan er núna stödd í vesturbænum hjá honum Þóri. Hann er orðinn mjög fit á því að borða hana. Svo á hann líka trampólín.

Það er svo óskaplega gaman í sumarfríi.
ritað af ~elísabetu~ klukkan 17:51. |

---

21.5.05
Vökustaurar

Skólinn er búinn í bili. Í gær/dag var tjaldferð til að halda upp á það. Hún var ágæt, svona tjaldferð bara. Hitapokar voru nauðsynlegir til að koma í veg fyrir að menn frysu í hel. Þannig að ég fraus ekki í hel. Sumarfrí eru ágæt til að bæta upp svefn, vona ég.
ritað af ~elísabetu~ klukkan 23:43. |

---

13.5.05
Föstudagrugl

Ég sit með hitapoka á stól.

Lesið notkunarreglurnar vandlega:
Skiljið ekki púðann eftir í sambandi án gæslu.
Notið ekki púðann samanbrotinn.
Stingið ekki í hann með nálum eða prjónum.
Púðann má ekki þurrhreinsa.
Verið má taka af og þurrhreinsa.

Ég hef brotið nokkur púðalög í dag. Ég var líka bara að lesa púðareglurnar áðan og vissi því ekki betur. Hann virkar samt bara betur eftir að ég þurrhreinsaði hann og stakk í hann prjóni. Að vísu fæ ég straum þegar ég kem við prjóninn. Ég veit ekki hversu mikinn straum því ég kann ekki eðlisfræði. Í dag þarf ég að læra eðlisfræði. Sem og alla daga fram að prófinu á þriðjudaginn.

Eins og áður sagði sit ég með hitapoka (púða) á stól. Ég er klædd í asnalega gul, græn og bleik sumarföt því mig langar svo að fá gott veður. Það hefur haft lítil áhrif á veðrið hingað til en það þýðir ekki að gefast upp. Ég hlusta á uppáhaldstónlistina mína í dag, Ratatat. Það var samt ekki uppáhaldstónlistin mín í gær og verður það sennilega ekki á morgun. Svo glápi ég út í loftið því ég skil ekki kílówattsstundir þó ég viti hvað þær séu. Eins og ég skil ekki einn frænda minn, þó ég viti hver hann er. Hann er líka frá Indlandi, spilar á hörpu og skríður. Áðan fór ég á brennsluna. Ég át kjúklingasamloku. Hún var góð og sveitt. Svo át ég brennsluref. Honum mæli ég ekki með.

Nú hafið þið, lesendur góðir, fengið óumbeðna innsýn í líf mitt í dag.

Í gær fór ég að sofa klukkan átta.

Það er svo gaman í prófum, ví!
ritað af ~elísabetu~ klukkan 18:22. |

---

6.5.05
Prófafráhvörf

Ég er haldin þeim ægilega sjúkdómi. Þegar ég tók jarðfræðiglósurnar og ætlaði að hefja lærdóminn sortnaði mér fyrir augun og ég misst allan mátt í líkamanum. Sem betur fer var rúmið nálægt svo ég hrundi á það. Þar lá ég lengi. Síðan hef ég reynt að plata mér samviskusamari nemendur í sukk og ógeð. Í sumum tilvikum tókst það. Svo sukk og ógeð verður það, ó vei.

.
ritað af ~elísabetu~ klukkan 17:49. |

---

5.5.05
Próf

Elísabet: Ég ætla að fara að sofa og læra ekkert fyrir sögu.

Pabbi: Elísabet, bara... stay cool.

.
ritað af ~elísabetu~ klukkan 21:02. |

---